احببت من واقع خبرتي المتواضعة ان اقدم بعض النصائح والارشادات لكل مبتدأ فى ممارسة المهنة وسوف ابدأ بارشادات
ومحاذير صرف الروشتة واعتبر هذه
بداية متواضعة واتمنى المشاركة واضافة المزيد كل حسب خبرته وحديثنا اليوم
عن روشتة لا تحتوى على ادوية مدرجة بالجدول لان مثل هذه الروشتات لها وضع
خاص نتحدث عليه لاحقا باذن الله
فى عجالة بالنسبة لصرف الدواء فهذا له اصوله
((وبافتراض ان الدكتور المتواجد بالصيدلية على دراية بكل الانواع الموجودة بالسوق او على الاقل الحد الادنى المطلوب))
فان ال handling الخاص بالروشتة له اصول وقواعد
خاصة مع العدد الكبير من الادوية
والذى يتزايد يوم عن اخر مع التشابه الكبير فى الاسماء والذى يصحبه احيانا
اختلاف كبير فى دواعى الاستعمال مما يضع الصيدلى فى موقف محرج جدا اذا وقع
فى هذا الخطا
وقبل ان ابدا فى عرض كيفية البدا فى صرف روشتة ما...
(باختصار)
اعرض عليكم مثال لتداخل اسماء الادوية مع الاختلاف الجوهرى فى دواعى الاستعمال
فمثلا
MONTEKAL و MONTACAL
كلاهما اقراص الاول منهم لعلاج الربو والثانى عبارة عن اقراص كالسيوم
مثال اخر:
PRONTO PLUS و PRONTO
الاول مسكن وخافض للحرارة والثانى قيتامينات ومعادن
والتفريق بينهم يبدو صعب للوهلة
الاولى خاصة ان الدكاترة الاطباء عادة لا يلتزمون بتحديد التركيز المطلوب
او الشكل الصيدلى وغالبا اول كام حرف ويشدوا خط (وانت بقى مع نفسك لحل
اللغزوالغوص فى متاهات وحوارى الروشتة طبعا التركيز والشكل الصيدلى بيفرقوا
احيانا كتير فى التفرقة ما بين الادوية اما لو اتبعنا ابسط القواعد
المطلوبة فباذن الله نسبة الخطا تتقلص كثيرا
اولا:
قبل صرف الروشتة عليك بالقاء نظرة سريعة على كل من اسم الطبيب وتخصصه
(عشان تعرف الخط والاتجاه اللى تمشى عليه )
كذلك بيانات سريعة عن المريض زى النوع
-(ذكر او انثى وبيبان عادة من الاسم )
كذلك السن
(وممكن نعرفه اما لو مكتوب صراحة او لو مكتوب الوزن او من تخصص الدكتور )
ولازم يكون عندنا سرعة بديهة يعنى لو الدكتور تخصصه اطفال يبقى الباقى كله اتعرف
ولو تخصصه مثلا نساء وولادة يبقى الباقى كله اتعرف يعنى فى حاجات بتعلن عن نفسها
ثانيا :
اخد فكرة سريعة عن الادوية المكتوبة عشان تقرر الاتى :
1-استيعابك وفكك للرموز المكتوبة من عدمه
2- هل كل الاصناف موجودة ام ستحتاج لتكملة جزء منها بشراءه من الخارج
(فلا تعاقب الزبون انه اشترى منك وتدعه يلف على صنف يكمل بيه الروشتة )
3- تقييم تكلفة الروشتة بالتقريب عشان لو سعرها زايد عن طاقة المريض اللى امامك
( طبعا حيكون ليك نظرة )
يبقى ساعتها ننبه المريض وده مثلا قبل ما نكتب على العلب ويرجع يقول مش عايز ده وده
او قبل ما نجهز الحقن فى حالة وجود حقن مكتوبة وحياخد منها فى الصيدلية
كل هذا يتم فى اقل من دقيقة عشان المريض يعتبر تاخرك فى الصرف مش خوف عليه ولكن ضعف منك او انك تعطيه (بديل) على حد قولهم
دعونا نناقش كل موقف
1- هل واجهتك صعوبة فى فكر رموز احد الادوية ؟
طيب هل دققت فى تخصص الدكتور عشان تعرف انت ماشى فى اى اتجاه من مجموعات الادوية ؟
طيب هل الروشتة لطفل ام لشخص بالغ ولو بالغ هل ذكر ام انثى ؟
هل الشكل الصيدلى وتركيز الدواء
( فى حالة وجود اكتر من تركيز )
هل هو واضح ام لا ؟
طيب هل الاستعمال ( وهو مكتوب بالعربى ) بيدلنا على شىء ويسهل القراءة والوصول لاسم الدواء الصح ؟
يعنى احيانا SYP و SUPP مع السرعة مبيفرقش بينهم الا الاستعمال بالعربى فى حالة وجود الشكلين لنفس الدواء
فالاول بينكتب ملعقة.... والثانى لبوس شرجى .
2- هل احد الادوية غير موجود؟
لو كذلك يبقى نبدا نبعت نشتريه اول حاجة عشان نكسب وقت والمريض ولايحس باى
تاخير ولا يفوتنا انه لو الصنف غالى واحتمال الزبون مياخدوش يبقى ننبهه
اننا حنشترى الدواء الفلانى اللى سعره كذا فلو لم يبدى اى اعتراض او تردد
يبقى تمام او انه يقرر انه لن ياخذه او يطلب نوع ارخص
3- هل تتوقع عدم قدرة المريض على دفع قيمة الروشتة كاملة ؟ وهل ابدى تردد بعد ما عرف تمنها ؟
ساعتها نحاول نكون متعاونين معاه ونبدا بعرض مثائل الاصناف الغالية واللى حنقنعه بيها انها لها نفس المفعول وندعه ياخد القرار بنفسه
وانا هنا انبه على نقطة الفرق بين الدواء المثيل والدواء البديل
فالدواء المثيل هو دواء له نفس المادة الفعالة ونفس التركيز والشكل الصيدلى ولكن مع اختلاف الشركة المنتجة
اما الدواء البديل فانه يتركب من مادة فعالة مشابهة ولكنها من نفس المجموعة الدوائية
طبعا كلما اتجهنا ناحية الدواء المثيل ال: BIOEQUIVALENT
كلما كان ذلك افضل واكثر امانا للمريض
اسف للاطالة ولكن دعونا الان نبدا فى صرف الروشتة :
اتجه نحو الرف بثقة ( طبعا
المفروض انك حافظ الصيدلية ) وابدا بسحب علبة الدواء حسب الترتيب المتفق
عليه لترتيب خروج الدواء حسب تاريخ الصلاحية الاقرب يخرج اولا
تاكد ان علبة الدواء لو بها اكثر
من شريط انك بتسحب علبة كاملة مش مفتوحة ( طبعا لو علبة مفتوحة ماخوذ منها
شريط لازم تكون مفتوح جزء منها على الاقل لتفرقتها عن العلبة الكاملة )
بنظرة سريعة تاكد وراجع سعر العلبة وتاكد من ان السعر خاص بالعلبة ولو كان بالشريط يبقى تضرب السعر فى عدد الشرايط
راجع بسرعة تاريخ الصلاحية تجنبا من وجود دواء منتهى تم نسيانه بالخطا على الرف
ابدا بوصف الاستعمال بصوت واضح للمريض بترتيب الادوية حسب الروشتة
اكتب الاستعمال بخط واضح وبدقة
وممكن تضيف اى ملاحظة جوهرية وانت بتكتب الاستعمال زى مثلا المسكنات اللى
لازم تكون بعد الاكل او الانواع اللى يفضل تكون قبل الاكل (وفى احيان كتير
الدكتور مبيحددش النقطة دى ) وده كله طبعا فى منطقة واضحة على العلبة ولو
العلبة من النوع اللى لا يقبل الكتابة عليه بالقلم الجاف عندها يستحب لصق
ستيكر صغير باسم الصيدلية لكتابة الاستعمال عليه
كمان بنحتاج الاستيكر ده لو المريض حياخد شريط مثلا من العلبة وطبعا يصعب كتابة الاستعمال عليه مباشرة
لا تضع الادوية فى الشنطة (الكيس المطبوع باسم الصيدلية ) قبل ان تحسب قيمتها
(عند
وضع الادوية بالشنطة يجب التاكيد على المساعد انه يتاكد ان الشنطة سليمة
لانه احيانا بعد وضع الادوية بالشنطة والمريض يمسكها من على الريون تطلع
الشنطة مقطوعة من تحت وتسقط الادوية (الاشربة طبعا) مكسورة على الارض
وساعتها حتجيب غيرها يا بطل من سكات على حسابك )
واخيرا لاتنسا الابتسامة المغلفة بالتمنيات بالشفاء العاجل ومتابعة المريض حتى يعطيك ظهره
طبعا نسينا نتكلم عن حسن استقبالك للمريض ولكن كلنا يعرف ان الترحاب بالضيف واجب عليك
اتمنى الا اكون نسيت شىء مهم ولكنى كلى ثقة انكم سوف تضيفون الكثير لهذا الموضوع
وان شاء الله لاحقا سوف نتحدث عن
التعامل المادى فى الفلوس ومحاذيره وكمان طرق النصب القديمة والحديثة فكل
سنة بيظهر طرق نصب جديدة يعنى على المودة
ولاحقا باذن الله سوف نتناول محاذير صرف الاصناف المدرجة بالجدول بدرجاته والاعيب وحيل المدمنين للحصول على تلك الاصناف
نقله أو كتبة لكم
-
*
-
*
-
DR.mt3b.
